Autor: Samuel Gimeno Artigas
Vivimos tiempos interesants, o nuestro mundo cambea ante os nuestros uellos. O mundo saliu d’o final d’a Unión Soviética ya no ye o mesmo. A guerra d’Ucraina y as suyas barallas lo han cambeau ta cutio. A guerra d’Ucraina ye una guerra parapeto, u “shell war” como la claman os anglosaxones.
A OTAN ha renaixiu d’as suyas cenisas, tornando a estar una alianza militarista y que aduya a acreixentar o esmo combatiu d’Ucraina. Rusia per a suya parte fa combatir a os suyos soldaus y a os mercenarios d’o grupo Wagner, a encarnixada baralla per Bajmut será remerada en o esdevenidero como una d’as mas sangrients y malas d’ista guerra.
China ha apresentau un plan de paz qui os paises occidentals han visto como contrario a os suyos intreses y a os intreses d’Ucraina. China se ye convertiendo en una potencia economica y diplomatica de primer orden. As suyas innovacions en campos como a intelichencia artificial, a fabricacion de microchips, o comercio electronico y os pagos electronicos son de primer nivel y a nivel d’o Silicon Valley estadounidense. Tanto ye asinas que o gubierno chino, quiere controlar as suyas interpresas.
Os Estados Unius por a suya parti han feito sancions contra as interpresas chinas pa queellas no aconsigan technolochias pa poder fer chips de zagueraa technolochia. Ixo ferá abanzar la industria china de microchips mas de lo que ye agora. Os Estados Unius son una potencia decadent. Agora somos en una trampa de Tucicides, cuan dos potencias, una emerchent y l’atra en decadencia luitan per o poder y os recursos naturals y amillorar a suya influencia en otros países.
China istas zagueras semanas s’ha apuntau varios tantos, o primero o acuerdo entre Arabia Saudí y Irán ta restableeixer as suyas relacions diplomaticas, lo que ha esdeveniu en o acuerdo pa a fin d’a guerra de Yemen, entre hutís y Arabia Saudí dimpués de ueito años de barallas. Otro tanto ha siu a visita de Xi Jinping a Moscú, pa veyer a Putin y amillorar as relacions economicas y diplomaticas entre Rusia y a China popular.
Europa ye una mica muerta, ye a mercet d’os americanos y aduyando fuertement a Ucraina con armas, tanques y atros suministros. Europa no ye fendo cosa per iniciativa propia, se ye barallando entre os suyos miembros, perque paises como Alemania e Hungria son u yeran amigos de Putin por suyos suministros de gas y petroleo.
Atros países como Irán y Turquía, son u aduyando a Rusia con os suyos drones como Iran u fendo diplomacia entre Rusia y Ucraina, como o alcuerdo de grans pa os países pobres que fizioron Rusia y Ucraina en Turquía. Turquía antimás ye fendo guerras u aduyando-las como en Kurdistán u Nagorno Karabaj.
Os paises africanos son achuntando-se con Rusia, qui les ha prometiu granos y fertilizans. Países como Sudáfrica, Congo u Mali son indo en cuallo con Rusia, contrariament a os dictaus d’as potencias occidentals. Antimás, paises como Mali y Burkina Faso han forachitau a o exercito frances d’os suyos países eliminando uno d’o zaguers repuis de dominio colonial frances.
Os países arabes son fendo tratos con Rusia y China y metendo distancia con os americanos, os suyos aliaus dende os años setenta d’o pasau sieglo, especialment Arabia Saudií y os Emiratos Arabes Unius cada vez mas unius a os chinos.
O nuestro país Aragón ye luitando per convertirse en un polo d’os abances technolochicos con a instalación de varios centros de datos d’o chigant Amazon. En atro puesto o nuestro país ye un d’os puntals d’as enerchías renovables, no sin contestación d’a chent por os suyos impactos medioambientals en a fauna y os paisaches d’o nuestro país d’os molins y as placas solars. Personalment me pareix sangrant os prochectos en muitos lugars como o Maestrazgo u Cinco Villas y que os partius de cuchas no son fendo cosa en o gubierno d’o nuestro país. Lo pior de tot ye que prochectos como a unión d’estacions de esquí y a esferra d’a Canal Roya se plegarán fendo con o callau de Cha y Podemos.
